ODLAR YURDU UNİVERSİTETİNDƏ “KARYERA: SMART MƏQSƏDLƏR” ADLI SEMİNAR KEÇİRİLDİ

07 oktyabr 2005-ci il tarixində Odlar Yurdu Universitetinin Tələbə Həmkarlar İttifaqı Komitəsi, “Avrasiya” tərcümə mərkəzi və “Gənclərin Səsi” platformasının birgə əməkdaşlığı ilə “Karyera: SMART Məqsədlər” adlı seminar təşkil edildi. Tədbir gənclərin şəxsi və peşəkar inkişafına dəyərli töhfə verdi. Seminarda karyera məsləhətçisi və təlimçi Əfsanə Rəhimova iştirak edərək gənclərlə çox önəmli məlumatlar paylaşdı. Təlim müddətində Əfsanə xanım iştirakçılara karyera planlamasının incəliklərini, məqsədləri düzgün müəyyənləşdirməyin yollarını və şəxsi inkişaf üçün atılmalı addımları öyrətdi. Görüş zamanı tələbələr effektiv kommunikasiya, komanda ilə əməkdaşlıq, məsuliyyət və vaxtın idarə olunması kimi bacarıqların önəmi ilə tanış oldular.

Təlimçilər həmçinin təşəbbüskar, öyrənməyə həvəsli olmaq və yeni bilikləri praktik tətbiq etmək bacarıqlarının hər bir gənc peşəkar üçün vacib olduğunu vurğuladılar. Seminar interaktiv formatda keçdi: tələbələr suallar verdilər, real nümunələr üzərində müzakirələr apardılar və gələcək karyera istiqamətlərini planlaşdırmaq üçün praktik tövsiyələr aldılar. Tədbir həm tələbələr, həm də “Avrasiya” tərcümə mərkəzi üçün faydalı oldu və gələcəkdə birgə layihələrdə əməkdaşlıq imkanlarını genişləndirməyə şərait yaratdı. Bu kimi təşəbbüslər gənclərin potensialını üzə çıxarmağa, onlara istiqamət verməyə və uğura aparan yolda motivasiya yaratmağa xidmət edir. Seminar iştirakçıların bilik və bacarıqlarını artırmaqla yanaşı onların gələcək peşəkar inkişaflarına əlavə dəstək oldu.