.png)
Azərbaycan Dillər Universitetində (ADU) tələbələr üçün Avrasiya Tərcümə Mərkəzi tərəfindən unikal görüş təşkil edilib. Tədbirin əsas məqsədi müasir tərcümə sahəsinin çağırışlarını təqdim etmək, tələbələrə bazar tələblərini izah etmək və peşəkar inkişaf üçün vacib bacarıqları çatdırmaq olub.
Görüşdə Mərkəzin təcrübəli mütəxəssisləri tələbələrlə tərcümə sahəsində real iş təcrübəsini paylaşaraq yazılı və şifahi tərcümənin əsas prinsiplərini, ixtisaslaşmış mətnlərlə işləmə üsullarını və terminologiyanın düzgün seçiminin əhəmiyyətini izah ediblər. Eyni zamanda, peşəkar etik normalar, vaxtın idarə olunması və rəqabət şəraitində davamlı öyrənmənin rolu vurğulanıb.
Təlim interaktiv formatda keçirilib: tələbələr real nümunələr üzərində müzakirələr aparıb, suallar verib və praktik tapşırıqları yerinə yetiriblər. Onlar həmçinin müasir texnoloji alətlərin tərcümə fəaliyyətində tətbiqi barədə ətraflı məlumat əldə ediblər.
Görüşün sonunda Mərkəz və universitet arasında gələcək əməkdaşlıq imkanları müzakirə olunub. Tələbələr həmçinin Avrasiya Tərcümə Mərkəzində təşkil olunacaq açıq qapı günü üçün dəvət alaraq mərkəzin iş prosesi və peşəkar mühiti ilə yaxından tanış olublar.
Avrasiya Tərcümə Mərkəzi qarşıdakı dövrdə də ali təhsil müəssisələri ilə əməkdaşlığı genişləndirməyi, tələbələrin peşəkar inkişafına dəstək olmağı və beynəlxalq standartlara uyğun biliklərin yayılmasını hədəfləyir.
.jpg)